Hvør skal arbeiða meiri?

Ein løgin logikkur, at tað skal loysa seg at arbeiða meiri. Hvør skal arbeiða meiri?

Tey alment løntu?

Skulu tey alment løntu arbeiða meiri? Ella skulu tey alment løntu niður í løn, tí so fara tey at arbeiða meiri? Ella skuldi tað almenna niðurlagast? Eru tað so tey, sum eru eftir, ið skulu arbeiða fyri tey, sum verða søgd upp? Og tað skal kanska verða yvirtíð, sum hvør skal gjalda – landskassin, kanska?

Fiskimenninir?

Skulu fiskimenninir fiska meiri? Skal steðgurin millum túrarnar styttast? Ella skulu fiskimenn arbeiða meiri í landi millum túrar? Ella skulu fleiri mans umborð á hvørt skip? Eru stovnarnir nú vorðnir so stórir, at fleiri skip kunnu fara til fiskiskap? Ella eru tað teir við nótabátunum, sum skulu arbeiða meiri? Eg møtti einum manni, sum segði seg hava verið umborð umleið 100 dagar og tjent væl yvir milliónina, skal hann arbeiða meiri, tí tað loysir seg? So má onkur í land giti eg. Ella kanska vil hann heldur vera saman við familjuni?

Flakafólkið?

Ella kanska eru tað tey, sum eru undir fiskavirkisskipanini, sum skulu arbeiða meiri? Hvar skulu tey arbeiða?

Hondverkarar?

Hondverkararnir, sum skuldu byggja skúladepilin í Marknagili sleppa so ikki fyribils at arbeiða meiri, heldur ikki teir, sum skulu byggja Tjóðpall. Ella skulu vit vóna, at tað koma fleiri ódnir, so arbeiði verður til fleiri hendur?

Tey arbeiðsleysu ella tey sjúku?

Ella eru tað tey arbeiðsleysu, sum skulu arbeiða meiri. Frálíkt hugskot, men hvar skulu tey arbeiða? Um øll hini fara at arbeiða meiri, so kann gerast trupult hjá teimum arbeiðsleysu at sleppa framat ella hvussu? Ella skulu tey sjúku arbeiða meiri?

Tey lesandi?

Kanska skulu tey lesandi, sum nú ikki fáa lestrarstuðulin hækkaðan, út at arbeiða, heldur enn at roksast við útbúgvingar.

Spekulantarnir kanska?

Kanska eru tað teir, sum í dag tjena milliónir, sum skulu arbeiða meiri, fyri at njóta skattalættan.

Nei eg spyrji bara.

Eg havi næstan mist hugin at arbeiða.

Sum man kann droyma skeivt

Eg droymdi, at her kom eitt flogfar við 87 høgtútbúnum fólkum og ØLL vóru fødd í Føroyum og dugdu at tosa føroyskt.
Og tey ætlaðu at búgva í Føroyum.
Nú fór at standa væl til, ha? Faktiskt betri enn so, tí gott og væl 80 % vóru kvinnur...ja, 70 kvinnur.
Fantastiskt!
2 dugdi kinesiskt, 8 vóru verkfrøðingar, 1 spældi tuba, 2 spældu urgu og 2 gittar, 8 vóru lærarar, 8 vóru flogskiparar (2 menn og 6 kvinnur), 9 vóru løgfrøðingar, 12 vóru maskinmeistarar, 4 sniðgevar, 7 cand-mercar, 5 marknaðarfrøðingar, 1 eskimologur, 3 útflutningsverfrøðingar, 1 datalogur, 2 tekniskir teknarar, 3 sjónleikarar, 7 timburmenn, 1 møilsnikkari, 1 skifpsførari.
Hatta var bara ein dreymur - tað var ein lætti.

Tað skal loysa seg...

Tað skal loysa seg at fara í grind - eisini í Sandavági.
Allir bátar yvir 40 fót skulu hava fullan frádrátt fyri oljunýtslu í grindarakstri, og allir bátar yvir 35 fót skulu verða tryggjaðir 1 skinn fyri hvønn mann, sum er umborð.
Tað má og skal loysa seg at fara í grind.

Ábyrgdin fyri slatri og sleygi liggur hjá teimum, sum skuldu verið professionel

Kl. 20.17  – Mikukvøld 16. november 2011.

Hvat meinar Portalurin við, at líkið av saknaða manninum ikki er funnið enn?

Enn? Eg havi ongastaðni sæð nakað vátta um, at maðurin skal vera deyður.

Eg havi sæð, at politiið hevur skuldsett ein mann fyri manndráp.

Dimma og Norðlýsið skrivaðu fyrr í dag, at líkið varð funnið.

Árni og kompaní. Hvussu við grundleggjandi journalistiska kravinum um, at tíðindi skulu váttast? Og so serliga í so álvarsomum málum.

Hetta er ikki góður journalistikkur. Í einum sovornum álvarsmáli áttu bløðini at víst sína professionalismu. Bløðini og tíðinda-portalarnir áttu at havt ein standard, sum var hægri enn tann á Facebook.

Sera illa frágingið handverk í einum so álvarsomum máli.

Her er bara at bíða eftir umberingunum.

Samstundis ikki eitt orð at hoyra frá politinum.

Hvat billa Jón Klein Olsen og Bergleif Brimvík sær inn.

At skuldseta ein mann fyri manndráp í Føroym og einki hava at siga fyri almenninginum.

Og fútin, sum fyrsta dagin hon var í Føroyum lovaði opinleika.

Gott kvøld frú fúti! Ert tú ikki til arbeiðis?

Tá sonevndu porfessionellu miðlarnir ikki halda ein sobran og professionellan standard og løgreglan, guð hjálpi tú mær, heldur ein enn óprofessionellari standard, ja, tá stuðla tit og eggja tit til slatur og sleyg.

Tað gerst ókeypis at siga alt og okkurt – sjálvt tey professionellu gera tað. Tey, sum skuldu lagt ein standard, sum bloggarar og facebook-brúkarar skuldu hildu seg til.

Offrini í hesum máli eru ikki haldarar og lesarar – tey fáa undirhald, juhu. Men tað sita onnur fólk kring landið, sum liva í ótta og stúrni.

Einasti rætti journalistikkurin í hesum máli er at sitera, hvat politiið sigur og tá politiið einki sigur, so leggið eftir politinum og syrgið fyri at alt annað er váttað og ikki leysasøgur.

Søtur er sjálvgivin biti

Ja, so er bara at svølja...

Nørda-tøl

Eg meini tað - hetta er fyri nørdar, sum ikki tíma Borgen...

Tey stakkaladýrini, sum eru fødd 4. 5. 6. 7. 8. 9. 14. 15. 16. 17. 18. 19. ella í oktober og desember ella eru fødd niðanfyri nevndu árini hava ongantið og fara ongantíð at upplíva tann dag, har tey kunnu lesa aftanifrá tann dagin, tá tey vóru fødd.
Livið er órrættvíst og sunnudagar langir....
1900 1904 1905 1906 1907 1908 1909 1904 1915 1916 1917 1918 1919 1924 1925 1926 1927 1928 1929 1933 1934 1935 1936 1937 1938 1939 1943 1944 1945 1946 1947 1948 1949 1953 1954 1955 1956 1957 1958 1959 1963 1964 1965 1966 1967 1968 1969 1973 1974 1975 1976 1977 1978 1979 1983 1984 1985 1986 1987 1988 1989 1993 1994 1995 1996 1997 1998 1999 2000 2004 2005 2006 2007 2008 2009
Dømi um tey lukkuligu: fødd 23.1.90 = 09.1.32 og 11.1.01 = 10.1.11
Og hini stakkaladýrini 29.5.08 = 80.5.92 - shit!

Harmilig samgonga

Fólkaflokkurin, sum var við til at frysta blokkin, tykist nú taka undir við at fara niður Danmarkar og biðja um meiri pening. Hetta vísir, at fólkaflokkurin ikki himprast at bróta politiskar semjur.
Ikki gott.
Snedugt - eg kenni næstan ongan, sum sigur seg hava atkvøtt fyri fólkaflokkinum.

http://youtu.be/PFqoF1hF3pw

Filmslist er eisini list

Sakaris Fríði Stórá var í fjør kosin ársins besti nýggi leikstjóri á filmfestivalinum í Reykjavík

Í listini er einki líka. Ymsar listagreinar hava ymiskan tørv.

Skal listin trívast og harvið eisini menniskjuni, so mugu vit síggja, at tørvurin er ymiskur.

Hóast allar listagreinar eru kroystar, so er lættari at nøkta tørvin hjá summum enn hjá øðrum – eitt nú filminum.

Vit skulu ikki standa so ovfarin og halda, at føroyskur filmur júst er dottin niður av himli. Vit skulu ikki standa og bíða, um hatta ikki nokk hvørvur aftur. Tvørturímóti eigur eisini filmslistin at takast í álvara.

Í roynd og veru hava vit í mong ár havt eina vakstrarlind í filmslistini og hava tørv á eini strategi fyri filmsframleiðslu. Her snýr tað seg um at lurta eftir teimum, sum arbeiða við filmsframleiðslu. Vit hava leingi havt møguleikan at gerast eitt land, sum kann gera vart við seg millum onnur lond við filmsframleiðslu.

Men hendan listagreinin hevur ikki verið tikin í álvara.

Filmsverkstaðurin Klippfisk hevur í fleiri ár ment bæði áhugan og framleiðslu av filmi. Katrin Ottarsdóttur og onnur hava eisini víst, at her eru møguleikar.

Ein vegur er at stovna ein filmsgrunn, sum bæði kann ráðgeva og fíggja filmsframleiðslu. Pengarnir kunnu bæði koma úr Føroyum og úr útlandinum gjøgnum altjóða samstarv.

Har eru fleiri altjóða samstørv fyri smáar tjóðir. Samstørv sum snúgva seg um fígging, útbreiðslu og upplæring.

Vit egia at gerast partur av hesum samstørvum.

Um pengarnir koma úr Monako ella Miðvági er líka mikið fyri føroyskan film, bara kreativa arbeiðið er her.

Nei, eg vísi ikki á fígging til okkara vallyfti

At tað nú skal vera forboðið at leggja síni politisku sjónarmið fram uttan samstundis at kunna vísa til, hvussu alt skal fíggjast, gevur yvirhøvur onga meining.

Helst er hetta ættleitt úr donskum politikki, har tað fyri eitt val stendur ein stjórnarmeiriluti klárur og tí kann geva haldbar politisk lyfti, sum so sjálvandi eisini krevja fígging.

Í Føroyum stendur ein – ofta drúgv – samráðingarleið fyri eftir eitt val.

Veljarin hevur yvirhøvur onga trygd fyri, at vallyftini eru meiri sannlík, um víst verður á okkurt ivasamt slag av fígging.

Eitt vallyfti er eitt lyfti um, hvørji mál vit arbeiða fram ímóti og hvørji virði vit byggja okkara politikk á og hvørjar broytingar vit vilja arbeiða fyri.

Politikkur er ikki pragmatisma, har einasta krav er, at okkurt roknistykki skal ganga upp.

Næstu mongu árini skulu vit læna pengar til okkara búskap, men tað er ikki líka mikið, hvussu vit brúka lænta peningin.

Har hava vit nøkur mál, nakrar broytingar og nøkur virði, sum vit lova at arbeiða fyri.

Vit hava sum mál einar sjálvstøðugar Føroyar.

Tjóðveldi hevur eisini sum mál, at ein burðardygg fiskivinna skal verða grundarlagið undir vinnuni. Vit hava sum mál, at Føroya Fólk fær ágóðan av fólksins ogn.
Vit halda hetta er vegurin til at gera hetta til okkara land.
Ongin politikari heldur, at tað skal vera eitt stórt undirskot á fíggjarlógini, men vit hava ikki øll somu mál, um hvussu pengarnir skulu brúkast.

Sjálvt um eg ikki í dag kann vísa á nakra beinleiðis fígging, so haldi eg, at undirvísing og útbúgving skal fáa meiri av felagskøkuni í sín part – fyri at taka eitt dømi. Meiri av lántu pengunum skulu fara tann vegin.

Tað er ikki minni týðandi við útbúgving, stuðli til tey veikastu ella liviligari kor til barnafamiljur, sjálvt um eingin ítøkilig fígging liggur á borðinum.

Tað er lætt bara at sleingja út: Bank Nordik skal privatisetast og so er alt goldið. Tað ger lyftini einki meiri sannlik.

Valyftini vera einki sannlíkari av, at siga: Næstu ferð selja vit makrelin dýrari.

So tá samráðingar verða eftir valið, so skulu fólk vita, hvørji mál vit hava, hvørjar broytingar vit vilja arbeiða fyri og hvørji virði vit byggja okkara politikk á.

Styrkin millum flokkarnar í Føroyum er avgerandi fyri, hvør politikkur verður rikin.

Mál, broytingar og virði hjá mær kunnu lesast her.

Ein virðiligan mentanar- og listapolitikk

Eg havi skrivað eina grein á listablogginum hjá Inger og Kinnu.
Greinin kann lesast her

Vit liva ikki tí, at tað loysir seg

Undrist eitt sindur yvir valróp nummar eitt frá Fólkaflokinum: Tað skal loysa seg at arbeiða.

Eg haldi í hvussu so er eisini, at tað skal vera avbjóðandi, spennandi, stuttligt og gevandi at arbeiða.

Eg tími at arbeiða, eg havi góðar arbeiðsfelagar, sum ríka mítt lív.

Eg arbeiði ikki bara tí tað loysir seg.

Ja, vit hava faktisk rætt til arbeiði – eisini tey arbeiðsleysu.

Giti, at nógv tey flestu gjarna vilja arbeiða og verða við til at menna hetta samfelagið, men tað eru eisini nógv sum ikki sleppa og helst eisini summi, ið ikki flyta aftur til Føroya, tí einki arbeiði er.

So kann tað tykjast løgið at hava – sum stórtsæð einasta vallyfti - at tað skal loysa seg at arbeiða, fyri at eggja fólki at arbeiða meiri. Hava tey hugsað um, at tað kanska eisini loysir seg at vera saman við familju, at lesa eina bók, at førleikamenna seg, at íðka ítrótt, at fara á flot ella kanska vitja eina listaframsýning.

Eg haldi tað gevur meiri meining at lova, at vit vilja arbeiða fyri at gera tað biligari at liva her og vit vilja leggja doyðin á fáa arbeiðsloysið niður. Vit vilja arbeiða fyri at steðga spekulasjón í fiskivinnuni og fyri burðardyggari fiskivinnu, so fiskivinnan gevur størri inntøku til alt føroyska samfelagið.

Vit liva altso ikki okkara lív, bara tí tað loysir seg.

Framsókn vil geva teimum vælbjargaðu sosialar veitingar

Framsókn veittrar nú við kontantum krónum - einum barnakekki - til allar barnafamiljur. Sjálvi siga tey, at kekkurin skal verða ein viðurkenning av, at børn eru eitt ríkidømi fyri samfelagið.

Jú, børn eru eitt ríkidømi. Men Framsókn viðurkennir ikki øll eins. Framsókn vil økja um ójavnan, tí tey leggja líka í, hvussu tær ymisku familjurnar eru fyri. Hjá nøkrum børnum merkir tað, at foreldrini fáa eina hjálp til at keypa mat og klæði. Og onnur børn fáa hægri lummapening - goldin úr almennnum kassa. Børn, sum longu merkja ójavnan - skulu merkja hann enn meiri, tí liberalistarnir halda tað gevur dynamikk í samfelagið at geva gávur til tey hægst løntu, um tey tíma at fáa sær børn.

At hjálpa hartraktum barnafamiljum er sosialpolitikkur. Og nú skulu tey vælbjargaðu hava sosiala veiting.
Tað er ójavni í inntøkum, men ein almennur barnakekkur ger ójavnan enn størri - serliga millum børnini.
Vit røkka ikki einum javnari samfelag við at geva teimum vælbjargaðu fíggjarligan fyrimun fyri at fáa fleiri børn. Vit røkka einum betri samfelag við, at allir borgarar hava ráð at liva her - og hava børn.

Hvønn man Framsókn tosa við?

Kom til arbeiðis! sigur Framsókn.
Munnu tey siga tað við tey arbeiðsleysu og tey sjúku.
Ella við løgmann ella eru tað eini harraboð til egnar veljarar?

Vit skulu taka Føroyar aftur

Taka valdið frá teimum, sum gloyma tað virðiliga menniskja sýnið – og bara hugsa um búskaparvøkstur og marknaðarkreftir. Vit skulu ikki stýrast eftir neo-liberalistisku tankagongdini, har menniskja er ein forbrúkari.
Í okkara meldri skal menniskja verða fremst.
Bankar og keypsskálar skulu ikki sleppa at seta dagsskránna. Vit skulu seta teimum krøv.
Vit skulu taka sjálvstýrið, har vit seta dagsskránna og hava alla ábyrgd.
Vøkstur tykist vera gandaorðið. Higartil hava vit sæð gjónna millum rík og fátøk vaksa, vøkstur í arbeiðsloysi og vøkstur í misáliti á politisku skipanina.
Tað er hesin vøksturin sum skal vendast til minking.
Tað hevði ført okkum nærri einum vaksnum Føroyum.

Sandoyggin eigur at verða vinnaraoyggj

Gekk mær ein túr niðan til húsini í Skopun, har eg eri føddur. Og hongdi so eina plakat uttanfyri.

Og eisini omanfyri húsini hjá Diduni

Eg lurtaði nógv á veljarafundi í Sandoynni í kvøld. Men tó so - eg gjørdi vart við, at Sandoyggin eigur at vera ein vinnaraoyggj. Eg ávaraði ímóti at tosa virðið og dygdina hjá oynni niðureftir, so fólk kring landið fóru at halda Sandoynna vera eina taparaoyggj. Skal Sandoyggin draga vinnu, útbúgving ella stovnar til sín, má oyggin gera vart við síni stóru virði. Tí meðan bíðað verður eftir einum tunnli, eiga vit eisini syrgja fyri at almennar íløgur koma útjaðaranum til góðar - eisini Sandoynni.

E: Plakatin á ferð

..og longu nú hava 48.738 valt at búgva í Føroyum

Vit eru 48.738, sum longu búgva her. Og teirra millum eru fleiri, sum eru flutt higar at búgva og ikki hava sin uppruna her.
Nógv skrála eftir vælútbúnum ungum kvinnum. Eg eri so væl fyri, at eg eri giftur við einari vælútbúnari ungari kvinnu – sum forrestin eisini hevur føtt okkum eitt barn. Tað er so +2.
So hon má verða í málbólkinum, sum vit venda okkum til, tá vit siga fólkavøsktur.
Tí var tað heldur ikki so trupult at biðja konu mína - Inger Smærup Sørensen - skriva nakrar reglur um, hví hon býr í Føroyum: 

Hvorfor bor jeg på Færøerne?
Fordi det er et land, hvor det personlige engagement føles vigtigt og hvor den enkeltes ansvar for fællesskabet er stort. Fordi jeg føler, at jeg bidrager til samfundet igennem min uddannelse og ved at bruge mig selv aktivt i den offentlige debat.
Det er en grundlægggende livskvalitet at føle ansvar. Det lille land har en klar fordel ved at dette ansvar føles så tydeligt og man så tydeligt ser ens egen betydning.

Uddannelse
For at fastholde den enkeltes ansvarsfølelse tror jeg det er vigtigt at kæmpe for, at uddannelse bliver taget alvorligt. Her tænker jeg ikke specifikt på akademisk uddannelse, men på al uddannelse. Det er vigtigt at vi alle føler, at det vi, hver i sær, har valgt at bidrage med til dette samfund bliver taget alvorligt og at uddannelse ikke bliver hånet.
Politikere skal altid lytte til de forskellige faggrupper og respektere specialiseringen ellers mister vi engagementet. Jeg vil have at min søn skal føle at det er værd at lære noget og dygtiggøre sig for at kunne deltage på en nuanceret måde i samfundet og spille en rolle. 

Fuldstænding demokrati
Det er også vigtigt for mig, at man som enkeltperson og som fællesskab føler at man er med til at bygge land. At føle at demokratiet er fuldstændigt. At kunne agere i verden på egne præmisser og tage ansvar for sit eget samfund.
En del af den stærke ansvarsfølelse dette land kan vække i den enkelte er afhængigt af, at vi føler, at der er et mål og at vi skal opnå større ansvar for landet indadtil og udadtil. 

Ret at bidrage
Den personlige ansvarsfølelse er betinget af, at vi føler at vi løfter noget i fællesskab. At alle uanset indkomst er sikret undervisning, behandling, pleje og kultur. At alle føler der er et samfund der tager hånd om dem, men også at vi alle har ret til at bidrage. Arbejdsløshed skal være et meget højt prioriteret politisk emne og alles ret til at være med til at løfte samfundet skal beskyttes.
For mig er økonomisk vækst mindre vigtig. Økonomisk stabilitet er vigtigt for at føle sig tryg, men vækst er ikke nødvendigt. En ansvarlig, stabil økonomisk politik er at foretrække.
Når det kommer til stykket kan vi næsten alle sammen frit vælge, hvor vi vil bo i verden og Færøerne vil aldrig blive det ideelle sted, hvis rigdom er det vigtigste.

Fullveldi gevur fulla styrki

Bæði kenslur og skilvísi eru grundir til, at vit arbeiða fyri fullveldi.

Men fullveldið er eisini vegurin, tí formyndarí riggar ikki og hevur ongantíð riggað.

Formyndarí, kolonialisma og imperialisma snúgva seg um at taka vald frá onkrum. Taka ábyrgdina og taka árræði frá fólki. Tað er at skerja fólkaræðið.

Í einum skerdum fólkaræði minkar álitið á politisku skipanina og uttan hetta álit minkar styrkin hjá fólkinum.

Vit vilja hava fulla styrki - allastaðni.

Tí vilja vit hava fullveldi í Føroyum.

Skattur er til skúlar og ikki til bankar

Hetta vóru orðini á einum skelti í mótmælisgongunum í Wall Street í New York móti grammleikanum og vargabúskapinum.

Í Suðurevropa tysja fólk út á gøturnar, tí stórir partar av fólkinum ikki longur vilja gjalda fyri avgerðir hjá ódugnaligum politikarum og spekulantum.

Fleiri og fleiri nokta at góðkenna, at profitturin – ella vinningurin – stjórabónus osv. skal privatiserast, meðan felagsskapurin skal gjalda, tá bankar spekulera og missa pening – okkara pening.

Bara hesir bankapakkarnir vísa, hvussu stórur partar av fólkinum verður bundin niður av grammleikanum hjá nøkrum fáum.

Føroysku bankarnir skuldu yvirhøvur ikki havt so sjálvsagdan rætt til allar lønarkonto. Øll áttu at fingið eina serliga almenna konto, har lønin fór inn og har skattur og øll gjøld  vóru drigin frá. So skulu vit sjálvi avgera, hvar pengarnir fara aftaná. At føroysku bankarnir hava einkarætt upp á pengarnar hjá øllum skattgjaldarum í Føroyum líkist ongum.

Eg haldi vit alvorliga eiga at umhugsa um bankar í eini tjóð sum okkara – onkursvegna – eiga at áleggjast samfelagsligar uppgávur. Tann mátin, sum føroysku bankarnir higartil hava virka upp á er ikki so sannførandi.

Um bankarnir partú skulu spekulera, so má spekulasjónin liggja í einum sjálvstøðugum parti av bankanum, sum kann fara á heysin, men so er tað spekulantarnir, sum missa sín pening. Og ikki sum nú, tá bankarnir koma til okkum onnur – við rentuhækkingum, ómaksgjaldum osv.

Faktisk haldi eg, at vit skuldu havt eitt tilboð til vanligt fólk og vanligar fyritøkur, sum bara vilja hava eitt stað at hava sín pening undir tryggum viðurskiftum, har til ber at læna pengar til tað sum krevst til eitt vanligt lív ella at hava eina vanliga fyritøku gangandi.

Djørv sjónarmið byggja á vitan

Politikkur er ikki pragmatiskur, men byggir á sjónarmið. Tað er ein sterk sannføring um, hvussu okkara samfelag best verður ment. Politikkur er, at vit standa fyri visjónum og virðum sum bera fram til batar.

Míni politisku sjónarmið hava støði í heilt grundleggjandi virðum, sum sita djúpt í mær. Virði sum samhaldsfesti. Áskoðanin um, at vit koma longst við at vera felags at bera byrðurnar, og at tey sterkastu hava eina natúrliga ábyrgd mótvegis teimum veikastu. Virði sum tolsemi og viðurkenning. Ynskið um eitt opið samfelag, har pláss er til øll og rúm er til ymiskleika. Virði sum javnrættur. Viljin til, at øll skulu hava somu møguleikar í samfelagnum, sama rætt til útbúgving, til sjúkrahús og lata rødd sína ljóða.

Míni politisku sjónarmið byggja eisini á visjónina um einar sjálvstøðugar Føroyar. Á grundleggjandi sannføringina, at vit sum búgva her, skulu hava evstu ábyrgd í egnum landi. Á tí grundarlagnum byggja vit eitt gott og trygt samfelag.

Bæði áðrenn og aftaná loysingina skulu vit hava eitt land, sum styðjar seg til hesi virði.

Vit skulu í okkara politikki nú vísa, hvat samfelag vit arbeiða fram ímóti í einum frælsum landi.

Meiningar, sannføringar, virði og visjónir eru týðandi fyri hvønn veg eitt samfelag fer. Men vitan hevur eins stóran týdning.

Vit skulu alla tíðina lurta eftir og taka tey við, sum hava vitan. Vitanin verður drigin inn í sjónarmiðini og í politiska arbeiðið. Vit skulu lurta eftir teimum, sum hava vitan um havið og fiskiskap.Vit skulu lurta eftir teimum, sum hava vitan um skúlar og útbúgving. Vit skulu lurta eftir teimum, sum hava vitan um burðardygga orku. Vit skulu lurta eftir teimum, sum hava skil fyri mentan og list. Vit skulu lurta eftir teimum, sum vita um handverk, mál, um sjúkrahús, bygging, ja, um alt hevur við okkara lív at gera.

Hesa vitan skulu vit brúka í arbeiðinum at skipa okkara samfelag eftir okkara politisku sjónarmiðum – bæði á veg til loysingina og eftir loysingina.

Vandin fyri serfrøðingaveldi er ikki til staðar í løtuni. Tá politikkur byggir á sjónarmið, so styrkir tað bara sjónarmiðini at hava vitanina.

Vit skulu vísa teimum, sum taka útbúgvingar og ogna sær vitan, at vit hava brúka fyri teimum og at vit lurta eftir teimum og at tey skulu og at tey sleppa at taka eina ábyrgd í samfelagnum.

Vitan gevur teimum sum taka avgerðir, eitt betri grundarlag og tey, sum hava vitanina, vilja búgva her og flyta higar.

Politisk virði og vitan skulu vera grundarsteinur, tá vit byggja land.

Míni politisku mál

Ypp øksl: Hanus syngur

Røða: Vit eru tey 99%-ini

Røða á Ypp øksl-tiltakinum hjá Unga Tjóðveldi leygardagin 15. okt. 2011

Góðu tit øll!

Vit øll eru tey 99 prosentini!

Har er eitt prosent eftir, men vit eru tey 99.

Hetta sum eg havi sagt ja til kann gerast upp á nógvar mátar.

Eg kann royna at spæla tann alfaðirligi, eldri, klóki, sum skal siga nøkur vaksin orð um, hvussu alt var betur tá babba var ungur og vit gingu mótmælisgongur og bara ikki vóru so ófokuserað, sum tit eru.

Eg kundi sagt tykkum søguna um, tá eg var handtikin uppi á Nato-støðini, tí eg royndi at greiða yvirsergentinum frá ”Der er vores fjeld!”

Ein annar máti er, at spæla ungur saman við tykkum og lova tykkum okkurt, sum eg i mínum aldri haldi at tit ungu ynskja. Eg kann siga okkurt um, at hetta valið snýr seg um tykkum og tykkara framtíð – og vit vilja gera alt fyri at tit skulu gerast glað.

Eg kundi sagt okkurt um, at tað skal vera ókeypis at, ja ókeypis at, ja ókeypis at, ja kundi lova okkurt ókeypis…

Men dagurin í dag – leygardagur 15. oktober 2011 – er nógv størri enn tað.

Í dag savnast fólk kring allan heim i meiri enn 1500 býum at mótmæla ti oyðandi megi, sum bankar og multinationalar fyritøkur hava havt á fólkaræði í heiminum.

Í dag savnast milliónir av heimsborgarum, at mótmæla teimum kreppum, sum verða skaptar í Wall Street í New York. Skaptar kreppur, sum kunnu ávirka okkum í fleiri ættarllið, um vit ikki steðga ørskapinum. Ja ger vit einki, so fara tit at standa her um 40 ár og siga, at nu er nóg mikið.

Hendan rørslan hevur sín uppruna í uppreistrunum í Egyptalandi, Tunesia, Spania, Grikkaland, Italia og Bretlandi.

Hendan heimsrørsla, sum veksur dag fyri dag, hevur til endmáls at vísa, hvussu tað er tað ríkasta eina prosenti av heimsins íbúgvum, sum skriva reglurnar fyri globala búskapin og sum tvinga neoliberalistiskar loysnir niður yvir heimsins íbúgvar – har ójavnrættur er endamálið.

Hetta eina prosenti av heimsins fólki standa í mínum heimi fyri álopi á mannarættindi, har umhvørvi og medmenniskjakensla hvørvur í grammleikans ørðskapi.

Ì vargabúskapinum.

Men í dag standa vit saman við milliónum í London, New York, Reykjavík, Cairo, Tokio og siga, at vit eru tey 99 prosentini, sum krevja fóllkaræði og búskaparligt rættvísi. Broyting og menning, har vit síggja okkum sum borgarar í heiminum, sum stríðast fyri javnari býti av ríkidøminum, sínámillum hjálp, samhaldsfesti, virðing og sjálvsvirðing.

Vit eru og vilja verða ein javnsettur partur av tí rørslu, sum í dag kring allan heim sigur nei til neoliberalismuna og ja til menniskuni á okkara knøtti – og ikki bara ja til tykkum, men til tykkar abba- og ommubørn.

Vit eru tey 99 prosentini, sum stríðast fyri einum heimi fyri øll.

Vit verða eisini tey 99 prosentini, sum vinna Føroyum sjálvstýri og geva okkum okkara sjálvsagda pláss sum ein tjóð í heiminum.

Vit øll eru tey 99 prosentini.

Kom vit gera tað!!

Heilsa til ressingarfund hjá tjóðveldinum fríggjakvøldið

Málini eru greið

Við ábyrgd siggja vit møguleikarnar

Á passinum stendur, at Føroyar eru dálkaðar við krígsblóði

Tá tú vísir passið á veg inn í Egyptaland, so ert tú borgari úr einum landi, sum er í kríggi í Irak og Afganistan, sjálvt um løgtingið atkvøddi í móti at fara í kríggj.

Tá tú vísir passið, ert tú borgari í einum landi, sum hevur eina av mest harðrendu kósum í heiminum mótvegis útlendingum. Ein politikkur, sum ikki sømir seg einum landi, ið virðir mannarættindi.

Tá tú vísir passið, er tú borgari í einum landi, sum ikki viðurkennir rættin hjá Føroyum at gera sína egnu grundlóg, uttan at hon leggur seg undir ta donsku.

Vit skulu ikki verða borgarar í einum landi, sum snýtti okkum, tá bankarnir vóru koyrdi á heysin í 90-unum. Vit uppdagaðu snýtaríið og fingu endurgjald, men bara tí vit uppdagaðu tað.

Vit skulu ikki vera borgarar í einum landi, sum ikki vil tosa okkara sak í makrelmálinum, tí landið er partur av Evropeiska Samveldinum.

Vit skulu ikki vera borgarar í einum landi, sum loyvir ólógligari flúgving  í føroyskum luftrúmi, uttan at spyrja okkum.

Vit mugu ikki missa málið úr eygsjón.

Vit skulu yvirhøvur ikki vera borgarar í nøkrum fremmandum landi.

Vit skulu taka alt vald í okkara egnu hendur. Tað gevur viðurkenning og sjálvsvirðing.

Vit skulu hava eitt tætt samstarv við danska fólkið og øll onnur fólk í heiminum.

Rættindi - eisini til tey samkyndu

Ljótt mistak í tinginum

Royndi at fáa hendingina í løgtinginum í gjár at sodna í nátt, og tað gekk nøkulunda.
Forkláringarnar kunnu vera mangar, burturforkláringarnar fleiri, men eftir stendur, at eitt uppskot um yvirtøkur fall við 2. viðgerð, og tað hevði tað ikki gjørt, um fýra tjóðveldisfólk høvdu møtt á løgtingsfundi.
Vit mugu viðganga, at hetta var eitt álvarsamt mistak.
Sjálvandi skulu tey, sum velja tjóðveldi, vita, at vit taka arbeiðið í álvara og sjálvandi skulu vit atkvøða fyri hvørjum einasta stigi á sjálvsstýrisleið.
Tá tað er sagt, so er kortini ein uggi í hesum, at vit mistu ikki nakra yvirtøku á stokkinum.
Yvirtøkan av eitt nú útlendingaøkinum hevði undir ongum umstøðum komið í gjøgnum eina triðju viðgerð.
Val hevði verið útskrivað áðrenn.
Hetta var eitt mistak, sum sær ljótt út, men sum ongar fylgjur fekk, aðrar enn at seta tjóðveldi í eitt keðiligt ljós beint undan valinum.
Men tí betur hava vit mál, sum kunnu og skulu røkkast.
Tá á stendur svíkja vit ikki.

Takka fyri okkum á Fólkatingi

Fyri okkum kann hesin salurin gott standa tómur.

Eg haldi, at Tjóðveldi skal sleppa gyklinum um, at ein fólkatingssessur hevur nakran serligan týdning. Tað er ikki í Fólkatinginum, at vit taka fetini á sjálvsstýrisleið.

Júst nú fáa vit undirtøku í Føroyum fyri, hvussu meiningsleyst tað er, at Føroyar skulu velja tvey umboð í Fólkatingið.

Tølini fyri valluttøku seinastu 10 árini síggja soleiðis út:

2001: 79,7%

2005: 72,7%

2007: 67,2%

2011: 58,9%

Meiri enn 6000 føroyingar fleiri á vali fyri 10 árum síðani.

Hetta má vísa, at fleiri og fleiri føroyingar halda tað verða meiningsleyst at velja til Fólkatingsvalið. Sjálvur var eg á vali, men ikki helt eg tað verða stuttligt og enn minni, at eg luttók í eini demokratiskari hending, sum hevði nakað við okkum at gera.

Tá so nógv velja at sita heima, so eru tey sjálvandi úr øllum flokkum. Hvørki Tjóðveldi ella nakar annar flokkur kann siga seg eiga tey, sum ikki atkvøða. Júst tí er tað faktisk eitt gott tekin: alt fleiri duga at síggja, at her er brek í skipanini. Hatta hevur einki við fólkaræði at gera, men er ein leivd úr eini grundlóg, sum vit ikki vilja hava skal galda í Føroyum.

Claus Carstensen í Havn

Í dag lat framsýning upp í Norurlandahúsinum og í Steinprent við danska listamanninum Claus Carstensen. Kinna Poulsen hevur sett framsýningina saman. Framsýningin eitur "Klaksvikaffærer". Hugskotið til heitið stavar frá eini prentmynd, sum listamaðurin gjørdi fyrstu ferðina, hann arbeiddi í Steinprenti í Havn í 2002.

Gott dømi: hvítar tenn

Rendi meg í hesar báðar lýsingarnar á Facebook. 

Men tær hoyra ikki saman, sum man kanska kundi trúð.

 

Mentan er mergurin í stríðnum fyri frælsi

Vit skulu hála mentan og list fram í politiska ljósið, sum mergin í stríðnum fyri frælsi.

Sera forkunnugt at hoyra mentan og list verða tikið í álvara í politikki.

Í løgmansrøðuni á ólavsøku – 49 síður – er ikki ein setningur, sum viðger, hvat ætlanin er at gera við mentan og list.

Um tað eru tey týdningarmestu málini, sum verða viðgjørd í eini løgmansrøðu, ja so liggur eitt stórt arbeiði fyri framman at lyfta mentan og list upp til eitt politisk mál, sum hevur uppiborið at sleppa upp í part.

Mentan og list skapað ikki bara trivnað, men mentan og list bjóða okkum av, eggja til kjak og flyta okkum.

Flokkar allir hava í sínum stevnuskráum nøkur vøkur orð um mentan og list. Vit hava eitt Mentamálaráð, eina mentanarnevnd í Løgtinginum og vit stuðla stovnar og fólk, sum arbeiða við mentan og list.

Men ringt er at fáa eyga á nakran mentanarpolitikk. Tað hevur ikki eydnast at gera mentan og list til eitt raðfest politiskt mál, har politiskar ætlanir liggja á borðinum.

Eg haldi vit kunnu siga tað so einfalt, at góð viðurskifti fyri mentan og list geva okkum eitt betri samfelag, sum eisini kann draga til sín allar tær kreativu kreftir, sum vit hava brúk fyri fyri at liva og anda.

Vit skulu tryggja listaligt og mentanarlig frælsi.

Okkara mentanarstovnar mugu hava best møgulig kor. Tað skal vera armslongd millum millum politisku skipanina tey, sum arbeiða við mentan og list. Hendan armslongdin fæst við at seta fakliga vitan ímillum.

Vit hava brúk fyri bæði áhugalist og professionellari list, men tey skulu ikki í sama pott. Stuðulin úr Mentanargrunnin skal ikki sløðast runt til onkran eftir ókendum kriterium. Áhugalistin skal hava hjálp og stuðul til skeið og framsýningar, meðan professionellu listafólkini skulu fáa stuðul til arbeiðsfrið. Hetta fer at merkja, at størsta peningaupphæddin fer til professionellu listafólkini, men tey eru og verða eisini drívmegin fyri alla aðra list.

Vit arbeiða fram í móti einum frælsum Føroyum, sum virðir føroyska mentan og list meiri enn pynt, ið bert hevur uppiborið hjásetningar.

Pragmatiskur: sí opportunist

Nú tá eg ikki stilli upp til fólkatingsvalið havi eg ikki havt so nógv fyri neyðini at lesa í frálíku orðabókini “Ordbog over det danske sprog”.

Men eg rendi meg í orðið “pragmatisk”, sum er vorðið eitt orð, sum onkur brúkar sum valagn.

Um tann, sum roynir at selja seg við orðinum “pragmatiskur” kemur í Fólkatingið, so kann hann sláa upp í “Ordbog over det danske sprog” og síggja, at har stendur “se også opportunist”.

Eg skilji væl, at ideologi kann tykjast strævin at baksa við og lætt er at freistast til bara at finna onkra loysn.

Men “pragmatisma” er ikki nakað gott svar.

Missa vit ideologirnar, so missir fólkaræðið eitt eyðkenni. Politikarar skulu hava áskoðanir og politisku flokkarnir skulu verða trúgvir móti sínum málum og visjónum – tað ger politisku skipanin gjøgnumskygda.

Pragmatikarar ella opportonistar skifta meining eftir tí sum er best beint nú fyri meg og míni.

Tað kunnu vit onnur ikki.

Ræðandi realisma

Hendan myndin frá seinasta valstríðið er so mikið ræðandi, at tað kann ikki vera serliga trupult at vita, hvat man heldur ikki má gera á løgtingsvalinum hesu ferð.

Marknaður er ikki gudur rættvísins

Tað er so umráðandi at styrkja vinstravongin her á landi. Ný-liberalistarnir spríkja upp allastaðni. Eg haldi, at á tjóðveldislistanum til løgtingsvalið ber til at styrkja tey, sum arbeiða fyri einum samhaldsføstum samfelag og vísa aftur, at marknaðarkreftirnar er gudur rættvísins.

Vit skulu arbeiða fyri einum opnum samfelagi, ið tolir og viðurkennir, at vit eru ymisk. Vit skulu ikki forera okkara ríkidømi til nakrar spekulantar. Munurin millum rík og fátøk skal ikki hámetast sum nøkur drívmegi. Tvørtur í móti merkir samhaldsfesti, at tey stekastu hava natúrliga ábyrgd mótvegis teimum veikaru.

Vit skulu arbeiða fyri so javnbjóðis møguleikum, sum til ber, til eitt nú arbeiði, skúla, sjúkrahús, tilfeingi og til at lata sína rødd telja við.

Bjóða av

Vit skulu síggja virði í mentan í breiðasta týdningi. At mentan og list eru meiri enn hjáputur, men ein partur av merginum. Vit skulu ikki bara fjálga um føroyska mentan, sum ofta verður tikið til, men vit skulu styrkja hana og stuðla hana og lata mentan og list bjóða okkum av, tí mentan og list eru grundleggjandi fyri, at vit tíma at vera her og flyta higar.

Vit arbeiða fram móti einum frælsum Føroyum, ið er partur av heimssamfelagnum. Tey sum í dag vísa leiðina móti einum samhaldsføstum samfelagi, skulu eisini standa sterk í arbeiðinum at gera einar frælsar Føroyar til eitt land, har øll tíma og vilja búgva,.

Á tí grundarlagnum byggja vit eitt gott og trygt samfelag. 

Djúp sannføring

Politikkur er ikki pragmatiskur, men byggir á sjónarmið. Tað er ein sterk sannføring um, hvussu okkara samfelag best verður ment. Vit skulu standa fyri visjónum og virðum sum bera fram til batar.

Míni politisku sjónarmið hava støði í hesum grundleggjandi virðum, sum sita djúpt í mær. Virði sum samhaldsfesti. Áskoðanin um, at vit koma longst við at vera felags at bera byrðurnar.Virði sum tolsemi og viðurkenning. Ynskið um eitt opið samfelag, har pláss er til øll og rúm er til ymiskleika. Virði sum javnrættur.

Vitan telur

At siga “vitan telur”, er ikki at banna.

Meiningar, sannføringar, virði og visjónir eru týðandi fyri hvønn veg eitt samfelag fer. Men vitan hevur eins stóran týdning.

Vit skulu alla tíðina lurta eftir og taka tey við, sum hava vitan. Vitanin verður drigin inn í sjónarmiðini og í politiska arbeiði. Vit skulu lurta eftir teimum, sum hava vitan um havið og fiskiskap.Vit skulu lurta eftir teimum, sum hava vitan um skúlar og útbúgving. Vit skulu lurta eftir teimum, sum hava vitan um burðardygga orku. Vit skulu lurta eftir teimum, sum hava skil fyri mentan og list. Vit skulu lurta eftir teimum, sum vita um handverk, mál, um sjúkrahús, bygging, ja, um alt hevur við okkara lív at gera.

Hesa vitan skulu vit brúka í arbeiðinum at skipa okkara samfelag eftir okkara politisku sjónarmiðum – bæði á veg til loysingina og eftir loysingina. 

Ábyrgd skal takast

Vandin fyri serfrøðingaveldi er ikki til staðar í løtuni. Tá politikkur byggir á sjónarmið, so styrkir tað bara sjónarmiðini at hava vitanina.

Vit skulu vísa teimum, sum taka útbúgvingar og ogna sær vitan, at vit hava brúka fyri teimum og at vit lurta eftir teimum, og at tey skulu og at tey sleppa at taka eina ábyrgd í samfelagnum.

Vitan gevur teimum sum taka avgerðir, eitt betri grundarlag og tey, sum hava vitanina, vilja búgva her og flyta higar.

Politisk virði og vitan skulu vera grundarsteinurin, meðan vit byggja land.

Alt barnatilfar skal vera á føroyskum

Eitt av mínum hjartamálum. Øll verða vit spulaði við útlendskum – serliga donskum – tilfari av øllum líkinda slag. Vit vaksnu kunnu so nøkurlunda standa ímóti.

Men hetta er trupult hjá børnunum.

Og her eiga vit at gera nógv. Bæði við at stuðla og eggja teimum, sum framleiða føroyskt tilfar og við forboði. Eg haldi, at tey sjónvarpsfeløg, sum bjóða útlendskt sjónvarp í Føroyum skulu kroystast til at føroyska barnatilfarið. Eg haldi, at vit við lóg skulu krevja, at barnasjónvarp, sum verður sent í Føroyum, skal vera á føroyskum. Vit kundu kanska í fyrstu syftu kravt føroyskt tilfar ávísar klokkutímar um dagin, men sum frálíður skal alt barnatilfar, sum verður sent í Føroyum, verða føroyskað.

Rættindi eiga at vera her

Og vit eiga eisini sum skjótast at fáa rættindini hjá útlendskum feløgum til DVD-filmar yvir til føroysk feløg, sum vilja bjóða seg fram.

Í fyrsta lagi hugsi eg um barnatilfar.

Ein byrjan kundi verið, at Kringvarpið fekk sær rættindini til tað tilfar, sum longu er føroyskað og gav tað út.

Eg havi verið í samband við bæði donsk og íslendsk feløg, og har er sera trupult at sleppa framat við føroyskum teksti ella føroyskari talu. Millum annað tí rættindini at selja í Føroyum liggja hjá útlendskum feløgum.

Praktiskur pragmatikari

Í fjørðin

Í morgun hevði verið dagurin at farið í fjørðin. Tíbetur ber enn til at fara á grynnuna at fáa sær eitt kók. Fyri meg er tað ein partur av at liva her, at tað ber til at fara í fjørðin.

Sjónarmiðini í gjár verða snarað til veruleikan í dag

Kann ikki lata vera at hugsa um Sjúrð Skaale, sum herfyri gramdi seg um, at vit hava eina politiska skipan, har veljarin ikki veit, hvat hann fær, tá hann velur til løgtingsval.
    Nú sær út sum, at Sjúrður heldur, at tað ger einki. Ikki er neyðugt við nøkrum politiskum málum - bara man er pragmatikari og tekur sær politiska vinningin har, sum hann er beint nú,
    Hevur man politisk mál undan einum løgtingsvali, ja so tykist dygdin liggja í at duga at snara sjónarmiðunum í gjár til veruleikan í dag.
    Javnaðarformaðurin hevur í dag sagt, at málið hjá Javnaðarflokkinum ikki er fullveldi. Tað er so eitt politiskt sjónarmið.
    Men eg skilji ikki rættuliga, hví javnaðarfólk eru so ovurfegin at fáa fólk, sum nevna seg sjálvi pragmatikarar og har orðið liberalisma tykist vera meiri sigandi enn orðið sosialisma. Pragmatikarar, sum lættliga kunnu snúgva sær undan egnum politiskum sjónarmiðum fyri bara at passa inn í okkurt.
    Eg haldi, at politiskar loysnir skulu byggja á politisk sjónarmið, á vitan og ein vilja at náa málunum og ikki bara á praktisk atlit. So rillar fólkaræðið og løgtingsval vórðu óneyðug. So hevði verið nóg mikið við onkrum slagi av embætisverki - uttan politisk mál.
    Og hetta eru javnaðarfólk eftir øllum at døma so ovurfegin um.

Bókaútgáva og framsýning

Í dag lat framsýning við verkum eftir Hansinu Iversen upp í Steinprent. Samsundis kom bókin "Hansina Iversen - undurfullur ræðuleiki" út. Inger hevur skrivað bókina, sum eru samrøður, ið Hansina og Inger hava havt seinastu árini.

Teir eru ikki handtiknir - bara róligt

Kundi verið tveir italskir mafiabossar, sum júst eru handtiknir, men hatta eru bara ein fyrrverandi føroyskur ministari og ein fyrrverandi føroyskur aðalstjóri - bara róligt - kanska eru teir bara eitt sindur ónøgdir.

Álop á talufrælsið og góðkenning av skilaleysari fyrisiting

Løgmaður skrivaði í gjár fráboðan til øll stjórnmálaráðini, har hann fráboðar teimum  ikki at samskifta ella samstarva við felagsskapin Sea Shepherd Conservation Society

Hetta er heilt burturvið.

Fyri tað fyrsta er hetta beinleiðis álop á talufrælsið. Løgmaður skal ikki avgera, hvønn fólk mugu samskifta við.

Eg eri samdur við løgmann um, at tað nyttar einki at samskifta við Sea Shepard, tí tað verður misbrúkt, men hvørki løgmaður, forsætisráðharrin ella Drotningin, skulu senda fráboðanir út um, hvønn vit samskifta við.

Tað er roynd at avmarkað talufrælsið.

Í øðrum lagi er sera álvarsamt, um vit skulu hava álit á okkara fyrisiting, at løgmaður gevur beinleiðis fráboðan til fyrisitingina um at fyrisita øðrvísi mótvegis teimum, sum hann er ósamdur við.

Fyrisitingin skal arbeiða eftir teimum lógum og reglum, sum eru galdandi og ikki eftir um tað hóskar til meiningarnar hjá løgmanni.

Nú er meiri brúk fyri at uppbyggja eitt álit á fyrisitingina, heldur enn at fráboða og  góðkenna, at fyrisitingarlógir bert er galdandi fyri summi – nevnliga tey, sum løgmaðurin er samdur við.

Í grannskoðaramálinum verða í løtuni kanningar gjørdir móti tveimum av hægstu embætismonnunum í fyrisitingini – júst fyri at hava fyrisitið ymiskt – alt eftir um tað vóru fólk í teirra parti ella fólk í einum øðrum parti.

Tað ber ikki til.

Kaj Leo Johannesen, løgmaður (myndin lænt av Vágaportalinum)

Brævið frá løgmanni kann lesast her áVágaportalinum.

Ólavur visir sini drekakynstur

20 krónurs drekin úr BR fleyg, meðan konstruksjónin, sum er gjørd undir Heygnum, meiri er til listarliga flúgving og krevur sína mann....

Noyðast at hjálpa

Var inni á loppimarknaðinum á Áarvegnum fyrrapartin. Jóna hevði tikið stig til at savna pening inn til tey, sum líða hungur i Somalia.
Skilji væl, at fólk ikki orka at síggja myndirnar haðani uttan at kunna gera nakað.
Og tí skilji eg eisini sera væl hetta tiltakið. Hetta bæði útvegar pening og hjálpir okkum at hjálpa, tað vit nú einaferð kunnu.
Gott tiltak.
Eg kom heim við tveimum barnabókum.

Býarplanlegging úr Geneve

Borgarstjórin heldur hetta er so pent.
Eg haldi, at UEFA skal ikki standa fyri býarplanlegging í Havn. (Heldur ikki aðrastaðni!)

Edmund gevur ráð til stuttligari fólkafund á Doktaragrund

Hesi orðini fullu úr munni Edmund Joensens undir viðgerðini av løgmansrøðuni:

Eg vil siga, at um Edmund hevði havt rætt, so hevði tað verið stuttligari á Doktaragrund.
Eingin peikaði og faktisk var eg eitt sindur súrur inn á meg sjálvan, at mín røða var so óstuttlig - og tað vóru hinar so eisini. Eingin kláraði at fáa róp í - og Petur Pólson sang so ikki serliga hart.
Men hetta eru frálík ráð til fyrireikararnar, hvussu tey kunnu skipa næsta fólkafund á Doktaragrund.
So verður tað eitt sindur stuttligari.